ವಾಷಿಂಗ್ಟನ್‌: ಅಮೆರಿಕದ ನಿರ್ಗಮಿತ ಅಧ್ಯಕ್ಷ ಜೋ ಬೈಡನ್‌ ತಮ್ಮ ಅಧಿಕಾರಾವಧಿಯ ಕೊನೆಯ ದಿನಗಳಲ್ಲಿ ತಮ್ಮ ಪುತ್ರನಿಗೆ ಕ್ಷಮಾದಾನ ನೀಡಿದ್ದಾರೆ. ಜೋ ಬೈಡನ್‌ನ ಈ ಕ್ರಮದ ವಿರುದ್ಧ ಹೊಸ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಕಿಡಿ ಕಾರಿದಾರೆ.
ಜೋ ಬೈಡನ್‌ ಪುತ್ರ ಹಂಟರ್‌ ಬೈಡನ್‌ ಅಕ್ರಮವಾಗಿ ಬಂದೂಕು ಖರೀದಿ ಹಾಗೂ ತೆರಿಗೆ ವಂಚನೆ ಪ್ರಕರಣದಲ್ಲಿ ಅಪರಾಧ ಸಾಬೀತಾಗಿದೆ. ಈ ಪ್ರಕರಣದಲ್ಲಿ ಶಿಕ್ಷೆ ಪ್ರಕಟವಾದರೆ ಹಂಟರ್‌ ಬೈಡನ್‌ಗೆ 17 ವರ್ಷ ಜೈಲುಶಿಕ್ಷೆಯಾಗುವ ನಿರೀಕ್ಷೆ ಇತ್ತು. ಜೈಲಿಗೆ ಹೋಗುವ ಭೀತಿಯಲ್ಲಿರುವ ಹಂಟರ್‌ ಬೈಡನ್‌ಗೆ ಕ್ಷಮೆ ನೀಡಲು ಬೈಡನ್‌ ತೀರ್ಮಾನಿಸಿದ್ದು ಕ್ಷಮಾದಾನಕ್ಕೆ ಸಹಿ ಹಾಕಿದಾರೆ.
ಈ ಮೊದಲು ಜೂನ್‌ನಲ್ಲಿ ಜೋ ಬೈಡನ್‌ ತಮ್ಮ ಪುತ್ರನಿಗೆ ಕ್ಷಮಾದಾನ ನೀಡುವ ಸಾಧ್ಯತೆಯನ್ನು ಸ್ಪಷ್ಟವಾಗಿ ತಳ್ಳಿಹಾಕಿದ್ದರು. “ನಾನು ತೀರ್ಪುಗಾರರ ನಿರ್ಧಾರಕ್ಕೆ ಬದ್ಧನಾಗಿರುತ್ತೇನೆ. ನಾನು ಅವನನ್ನು ಕ್ಷಮಿಸುವುದಿಲ್ಲ ಎಂದು ಹೇಳಿದ್ದರು. ಆದರೆ ಈಗ ಬೈಡನ್‌ ತಮ್ಮ ತೀರ್ಮಾನವನ್ನು ಬದಲಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಜೋ ಬೈಡನ್‌ ವಿರುದ್ಧ ವಾಗ್ದಾಳಿ ನಡೆಸಿರುವ ರಿಪಬ್ಲಿಕನ್‌ ಪಕ್ಷದ ಸದಸ್ಯರು, ಹಂಟರ್‌ ಬೈಡನ್‌ ವಿದೇಶಗಳಲ್ಲಿ ಹೂಡಿಕೆ ಮಾಡಿರುವ ವ್ಯವಹಾರಗಳಲ್ಲಿ ಜೋ ಬೈಡನ್‌ ಕೂಡ ಪಾಲು ಹೊಂದಿದ್ದಾರೆ ಎಂದು ಆರೋಪಿಸಿದ್ದಾರೆ.
ಕೆಲ ವರ್ಷದ ಹಿಂದೆ ಅಕ್ರಮವಾಗಿ ಬಂದೂಕು ಖರೀದಿ ಮಾಡಿದ್ದರು ಎಂದು ಹಂಟರ್‌ ಬೈಡನ್‌ ವಿರುದ್ಧ 2023ರಲ್ಲಿ ದೋಷಾರೋಪ ಹೊರಿಸಲಾಗಿತ್ತು. ಪ್ರಕರಣದ ವಿಚಾರಣೆಯ ಸಂದರ್ಭದಲ್ಲಿ ತಾನು ಡ್ರಗ್ಸ್‌ ತೆಗೆದುಕೊಳ್ಳುತ್ತಿಲ್ಲ ಎಂದು ಸುಳ್ಳು ಹೇಳಿದ್ದರು. ಆದರೆ ವೈದ್ಯಕೀಯ ಪರೀಕ್ಷೆಯಿಂದ ಅವರು ಡ್ರಗ್ಸ್‌ ತೆಗೆದು ಕೊಳ್ಳುತ್ತಾರೆ ಎಂದು ಸಾಬೀತಾಗಿತ್ತು. ನಂತರ ಅವರ ಮೇಲೆ ಪ್ರಕರಣ ದಾಖಲಿಸಲಾಗಿತ್ತು.