ಒಮರ್ ಅಬ್ದುಲ್ಲಾ ಹಾಗೂ ಅವರ ಪಕ್ಷವಾದ ನ್ಯಾಷನಲ್ ಕಾನ್ಫರೆನ್ಸ್ (NC) ನಿಂದ ನಮಗೆ ಯಾವುದೇ ನಿರೀಕ್ಷೆಗಳಿಲ್ಲ ಎಂದು ಕಾಶ್ಮೀರಿ ಪಂಡಿತ ಸಮುದಾಯ ಸ್ಪಷ್ಟವಾಗಿ ತಿಳಿಸಿದೆ. ದಶಕಗಳಿಂದ ನಮಗೆ ದ್ರೋಹ ಬಗೆದು, ನಮ್ಮ ಸಂಪ್ರದಾಯ, ನಮ್ಮ ಪರಂಪರೆಯನ್ನು ಅವಮಾನಿಸುತ್ತಲೆ ಬರುತ್ತಿರುವ ಒಮರ್ ಅಬ್ದುಲ್ಲಾ ಹಾಗೂ NC ಪಕ್ಷ ನಮಗೆ ಬೇಕಾಗಿಲ್ಲ ಎಂದು ತಮ್ಮ ನಿಲುವನ್ನ ಸ್ಪಷ್ಟಪಡಿಸಿದ್ದಾರೆ. ಹಾಗಾಗಿ ನಾವಿನ್ನು ಮೌನವಾಗಿರಲು ಸಾಧ್ಯವಿಲ್ಲ ಎಂಬುವುದು ಅವರ ನಿಲುವಾಗಿದೆ ಎಂದು ಕಾಶ್ಮೀರಿ ಪಂಡಿತರು ಪತ್ರಿಕಾ ಪ್ರಕಟನೆಯನ್ನ ಹೊರಡಿಸಿ ತಮ್ಮ ವರ್ಷಗಳ ಅಸಮಾಧನವನ್ನ ಹೊರಹಾಕಿದ್ದಾರೆ.

ಪತ್ರಿಕಾ ಪ್ರಕಟಣೆಯಲ್ಲಿ
ಕಾಶ್ಮೀರಿ ಪಂಡಿತರಿಗೆ NC ಪಕ್ಷ ಮಾಡಿರುವ ದ್ರೋಹ ಇಂದು ನೆನ್ನೆಯದಲ್ಲ. ಇದರ ಹಿಂದೆ ದೊಡ್ಡ ಇತಿಹಾಸವೇ ಇದೆ. 'ಕಾಶ್ಮೀರದ ಸಿಂಹ' ಎಂದು ಕರೆಯಲ್ಪಡುವ ಶೇಖ್ ಅಬ್ದುಲ್ಲಾ ಅವರು ತಮ್ಮ ವಿಭಜಕ ರಾಜಕೀಯದಿಂದ ನಮ್ಮ ಸಮುದಾಯವನ್ನು ಉದ್ದೇಶಪೂರ್ವಕವಾಗಿ ಮೂಲೆಗುಂಪು ಮಾಡಿದ್ದು, ಮತದಾನದ ಹಕ್ಕನ್ನು ಕಸಿದುಕೊಂಡಿದ್ದಾರೆ.  ಅವರ ನಾಯಕತ್ವವು ನಮ್ಮ ಸಾಮೂಹಿಕ ನಿರ್ಗಮನದಲ್ಲಿ ಕೊನೆಗೊಂಡ ಹಿಂಸೆಗೆ ಅಡಿಪಾಯವನ್ನು ಹಾಕಿತು. ಅವರು ಬಿತ್ತಿದ ಕೋಮುವಾದಿ ಬೀಜಗಳು ನಮ್ಮನ್ನು ನಮ್ಮ ಮನೆಗಳಿಂದ ಮತ್ತು ಪವಿತ್ರ ಭೂಮಿಯಿಂದ ಓಡಿಸಿದವು.

ಆದರೆ ಅಬ್ದುಲ್ಲಾ ಕುಟುಂಬದ ಪಾಪಗಳು ಶೇಖ್ ಅಬ್ದುಲ್ಲಾ ಅವರೊಂದಿಗೆ ಕೊನೆಗೊಳ್ಳಲಿಲ್ಲ. 1990 ರಲ್ಲಿ, ಕಣಿವೆಯನ್ನು ಭಯೋತ್ಪಾದನೆ ಆವರಿಸಿದಾಗ, ಕಾಶ್ಮೀರಿ ಪಂಡಿತರು ಊಹಿಸಲಾಗದ ಭಯಾನಕತೆಯನ್ನು ಎದುರಿಸಿದಾಗ, ಆಗಿನ ಜಮ್ಮು ಮತ್ತು ಕಾಶ್ಮೀರದ ಮುಖ್ಯಮಂತ್ರಿ ಫಾರೂಕ್ ಅಬ್ದುಲ್ಲಾ ನಮ್ಮನ್ನು ಕೈಬಿಟ್ಟರು. ಆಗ ತಮ್ಮ ಹುದ್ದೆಯನ್ನು ತ್ಯಜಿಸಿ, ರಾಜ್ಯವನ್ನು ತೊರೆದು, ನಮ್ಮ ಜನರ ಜನಾಂಗೀಯ ಶುದ್ಧೀಕರಣ ಮತ್ತು ನರಮೇಧದ ಬಗ್ಗೆ ಕಣ್ಣುಮುಚ್ಚಿ ಕುಳಿತರು. ಅವರ ಕಣ್ಗಾವಲಿನಲ್ಲಿ ಕಾಶ್ಮೀರಿ ಪಂಡಿತರನ್ನು ಬಲವಂತವಾಗಿ ಗಡೀಪಾರು ಮಾಡಿ, ಅವರ ಮನೆಗಳನ್ನು ಲೂಟಿ ಮಾಡಲಾಯಿತು. ಜೊತೆಗೆ ಅವರ ದೇವಾಲಯಗಳನ್ನು ಅಪವಿತ್ರಗೊಳಿಸಲಾಯಿತು. ಅಷ್ಟೇ ಅಲ್ಲದೇ ಕಶ್ಮೀರಿ ಪಂಡಿತರ ಜೀವನವನ್ನು ತಮ್ಮದೇ ನೆಲದಲ್ಲಿ ನಿರಾಶ್ರಿತರ ಜೀವನಕ್ಕೆ ತಳ್ಳಲಾಯಿತು. ಫಾರೂಕ್ ಅವರ ದ್ರೋಹವು ನಮ್ಮ ಸಾಮೂಹಿಕ ನೆನಪಿನಲ್ಲಿ ಅಚ್ಚಳಿಯದೆ ಉಳಿದಿದ್ದು, ಇದು ಅಬ್ದುಲ್ಲಾ ರಾಜವಂಶವು ನಮ್ಮ ಕರಾಳ ಸಮಯದಲ್ಲಿ ನಮ್ಮನ್ನು ಹೇಗೆ ಅಸಹಾಯಕರನ್ನಾಗಿ ಮಾಡಿದರು ಎಂಬುದನ್ನು ನೆನಪಿಸುತ್ತದೆ.

ಈಗ, ಒಮರ್ ಅಬ್ದುಲ್ಲಾ ಈ ರಕ್ತಸಿಕ್ತ ಪರಂಪರೆಯನ್ನು ಮುಂದುವರಿಸಿದ್ದಾರೆ. ತನ್ನ ಕುಟುಂಬದ ನೀತಿಗಳು ರೂಪಿಸಲು ಸಹಾಯ ಮಾಡಿದ ನರಮೇಧದ ಬಗ್ಗೆ ಅವರು ಮೌನವಾಗಿದ್ದಾರೆ. ಐತಿಹಾಸಿಕ ತಪ್ಪುಗಳನ್ನು ಪರಿಹರಿಸಲು ಅವರು ಏನನ್ನೂ ಮಾಡಿಲ್ಲ,  NC ಪಕ್ಷದ ಇತ್ತೀಚಿನ ಕ್ರಮಗಳು ನಮ್ಮ ಸಂಸ್ಕೃತಿ ಮತ್ತು ಆಧ್ಯಾತ್ಮಿಕ ಪರಂಪರೆಗೆ ಸಂಪೂರ್ಣ ಅಗೌರವವನ್ನು ತೋರಿಸುತ್ತವೆ. ಇತ್ತೀಚಿಗೆ NC  ಪಕ್ಷದ ಕಾರ್ಯಕರ್ತರು ನಮ್ಮ ಪವಿತ್ರ ಆಧ್ಯಾತ್ಮಿಕ ತಾಣಗಳನ್ನು ಅಪವಿತ್ರಗೊಳಿಸಿರುವುದು ಕಾಶ್ಮೀರಿ ಪಂಡಿತರ ಬಗ್ಗೆ ತಿರಸ್ಕಾರದ ಕೃತ್ಯವಾಗಿದೆ. ಒಮರ್ ಅಬ್ದುಲ್ಲಾ ನಮ್ಮ ನಂಬಿಕೆಯನ್ನು ಅವಮಾನಿಸಿದ್ದಾರೆ, ನಮ್ಮ ಕಷ್ಟಗಳನ್ನು ಅಣಕಿಸಿದ್ದಾರೆ. ಇಷ್ಟೆಲ್ಲಾ ಮಾಡಿ ಅವರ ಕೈಗಳು ಸ್ವಚ್ಛವಾಗಿವೆ ಎಂದುಕೊಂಡಿದ್ದಾರೆ. ಆದರೆ ಅದೆಲ್ಲ ಬರಿ ನಾಟಕ.

ಒಮರ್ ಅಬ್ದುಲ್ಲಾ ತನ್ನ ತಂದೆ ಮತ್ತು ಅಜ್ಜನಂತೆ ಕಾಶ್ಮೀರಿ ಪಂಡಿತರ ಅಸ್ಮಿತೆ, ಸಂಸ್ಕೃತಿ ಮತ್ತು ಇತಿಹಾಸವನ್ನು ಅಳಿಸಿಹಾಕುವಲ್ಲಿ ಭಾಗಿಯಾಗಿದ್ದಾನೆ. ಕಾಶ್ಮೀರಿ ಪಂಡಿತರ ಸಾಮೂಹಿಕ ನಿರ್ಗಮನದಲ್ಲಿ ತಮ್ಮ ಕುಟುಂಬದ ಪಾತ್ರಕ್ಕಾಗಿ ಅವರು ಎಂದಿಗೂ ಕ್ಷಮೆಯಾಚಿಸಿಲ್ಲ ಹಾಗೂ ಕಾಶ್ಮೀರಿ ಪಂಡಿತರು ತಮ್ಮ ತಾಯ್ನಾಡಿಗೆ ಮರಳುವುದನ್ನು ಬೆಂಬಲಿಸಲು ಅವರು ಯಾವುದೇ ಪ್ರಯತ್ನ ಮಾಡಿಲ್ಲ. ನಮ್ಮ ನರಮೇಧದ ಬಗ್ಗೆ ಅವರ ಮೌನ ಕೇವಲ ಹೇಡಿತನವಲ್ಲ- ಅದು ಅವರು ಇದರಲ್ಲಿ ಶಾಮೀಲಾಗಿದ್ದಾರೆ ಎಂಬುವುದನ್ನ ತಿಳಿಸುತ್ತದೆ. ಅಬ್ದುಲ್ಲಾ ರಾಜವಂಶದ ಕೈಗಳಲ್ಲಿ ರಕ್ತವಿದೆ, ರಾಜಕೀಯವಾಗಿ ಅದನ್ನು ತೊಳೆಯಲು ಸಾಧ್ಯವಿಲ್ಲ.

ಕಳೆದ 34 ವರ್ಷಗಳಿಂದ ನಾವು ನ್ಯಾಯಕ್ಕಾಗಿ ಕಾಯುತ್ತಿದ್ದೇವೆ. 34 ವರ್ಷಗಳಿಂದ, ನಮ್ಮ ಸಂಸ್ಕೃತಿ, ಪರಂಪರೆ ಮತ್ತು ಗುರುತನ್ನು ವ್ಯವಸ್ಥಿತವಾಗಿ ನಾಶಪಡಿಸುವುದನ್ನು ನಾವು ನೋಡಿದ್ದೇವೆ, ಆದರೆ NC ಪಕ್ಷ ನಮ್ಮ ಕಿರುಕುಳದ ಜ್ವಾಲೆಗೆ ತುಪ್ಪ ಸುರಿಯುವುದನ್ನು ಹೊರತುಪಡಿಸಿ ಬೇರೇನೂ ಮಾಡಿಲ್ಲ. ನಮ್ಮ ಆಧ್ಯಾತ್ಮಿಕ ಸ್ಥಳಗಳ ಪಾವಿತ್ರ್ಯದ ಬಗ್ಗೆ ಒಮರ್ ಅಬ್ದುಲ್ಲಾ ಅವರ ಇತ್ತೀಚಿನ ನಿರ್ಲಕ್ಷ್ಯವು, ಅವರ ಹಿಂದಿನವರಂತೆ ಅವರಿಗೆ ನಮ್ಮ ಸಮುದಾಯ ಅಥವಾ ನಮ್ಮ ನಂಬಿಕೆಗಳ ಬಗ್ಗೆ ಯಾವುದೇ ಗೌರವವಿಲ್ಲ ಎಂಬುದನ್ನು ತೋರಿಸುತ್ತದೆ. ನ್ಯಾಷನಲ್ ಕಾನ್ಫರೆನ್ಸ್ ಪ್ರತಿ ತಿರುವಿನಲ್ಲಿಯೂ ಕಾಶ್ಮೀರಿ ಪಂಡಿತರಿಗೆ ದ್ರೋಹ ಬಗೆದಿದ್ದು ಮತ್ತು, ನಮ್ಮ ವಿನಾಶದಲ್ಲಿ ಅವರು ವಹಿಸಿದ ಪಾತ್ರವನ್ನು ನಾವು ಮರೆಯಲು ನಿರಾಕರಿಸುತ್ತೇವೆ.

ಶೇಖ್ ರಿಂದ ಫಾರೂಕ್ ನಿಂದ ಒಮರ್ ವರೆಗೆ ಅಬ್ದುಲ್ಲಾ ಕುಟುಂಬವು ಕಾಶ್ಮೀರಿ ಪಂಡಿತರ ಬಗ್ಗೆ ತಿರಸ್ಕಾರವನ್ನು ಹೊರತುಪಡಿಸಿ ಬೇರೇನೂ ಮಾಡಿಲ್ಲ. ಅವರು ನ್ಯಾಯಕ್ಕಿಂತ ರಾಜಕೀಯ ಅಧಿಕಾರವನ್ನು ಆರಿಸಿಕೊಂಡಿದ್ದಾರೆ. ಅವರು ನಮ್ಮ ಇತಿಹಾಸವನ್ನು ಎದುರಿಸುವ ಬದಲು ಅಳಿಸಿಹಾಕಲು ಪ್ರಯತ್ನಿಸುತ್ತಿದ್ದಾರೆ.ಹಾಗೂ ನಮ್ಮ ಪವಿತ್ರ ಸ್ಥಳಗಳು ಮತ್ತು ಸಂಪ್ರದಾಯಗಳನ್ನು ಪದೇ ಪದೇ ಅಗೌರವಿಸಿದ್ದಾರೆ. ಅವರು ನಮಗೆ  ದ್ರೋಹ ಬಗೆದಿದ್ದು ಸಾಕಾಗಿದೆ, ಮತ್ತು ಅವರಿಂದ ನಮಗೆ ಯಾವುದೇ ಭರವಸೆ ಅಥವಾ ನಿರೀಕ್ಷೆಗಳು ಉಳಿದಿಲ್ಲ.

ನರಮೇಧ ಮತ್ತು ನಮ್ಮ ಜನರನ್ನು ಬಲವಂತವಾಗಿ ಗಡೀಪಾರು ಮಾಡುವಲ್ಲಿ ಅಬ್ದುಲ್ಲಾ ಕುಟುಂಬ ಮತ್ತು ನ್ಯಾಷನಲ್ ಕಾನ್ಫರೆನ್ಸ್ ವಹಿಸಿದ ಪಾತ್ರವನ್ನು ನಾವು ಎಂದಿಗೂ ಕ್ಷಮಿಸುವುದಿಲ್ಲ. ಅವರ ಕೈಗಳ ಮೇಲಿನ ರಕ್ತ, ಸಹಾಯಕ್ಕಾಗಿ ನಮ್ಮ ಕೂಗುಗಳ ಎದುರಿನ ಮೌನ ಮತ್ತು ನಮ್ಮ ಪರಂಪರೆಗೆ  ಅವರು ಮಾಡಿರುವ ಅಪಮಾನವನ್ನು ನಾವು ಎಂದಿಗೂ ಮರೆಯುವುದಿಲ್ಲ.

ಒಮರ್ ಅಬ್ದುಲ್ಲಾ ಮತ್ತು ನ್ಯಾಷನಲ್ ಕಾನ್ಫರೆನ್ಸ್ ಅನ್ನು ತಿರಸ್ಕರಿಸುವಲ್ಲಿ ಕಾಶ್ಮೀರಿ ಪಂಡಿತರು ಒಗ್ಗಟ್ಟಾಗಿ ನಿಂತಿದ್ದಾರೆ. ನಮ್ಮನ್ನು ಮೌನಗೊಳಿಸಲಾಗುವುದಿಲ್ಲ, ಅಳಿಸಲಾಗುವುದಿಲ್ಲ, ಮತ್ತು ನಾವು ನ್ಯಾಯಕ್ಕಾಗಿ ಹೋರಾಡುವುದನ್ನು ಮುಂದುವರಿಸುತ್ತೇವೆ. NC ಪಕ್ಷ ಇತಿಹಾಸವನ್ನು ಮತ್ತೆ ಬರೆಯಲು ಎಷ್ಟೇ ಪ್ರಯತ್ನಿಸಿದರೂ ನಮಗೆ ಕೊಟ್ಟ ಕಿರುಕುಳವನ್ನ ನಾವು ಎಂದಿಗೂ ಮರೆಯಲಾಗುವುದಿಲ್ಲ.
ನಾವು ಎಂದಿಗೂ ಕ್ಷಮಿಸುವುದಿಲ್ಲ,ನಾವು ಎಂದಿಗೂ ಮರೆಯುವುದಿಲ್ಲ ಎಂದು ಹೇಳಿದ್ದಾರೆ.